SVP-UDC feston nën mbrojtjen e policisë

Për shkak të rrezikut nga incidentet, tubimi është mbajtur nën masa të jashtëzakonshme sigurie

Partia SVP-UDC ka mbajtur dje një “manifestim familjar” në Bundesplatz të Bernës, ku, sipas organizatorëve, kanë marrë pjesë rreth 6000 veta. Për shkak të rrezikut nga incidentet, tubimi është mbajtur nën masa të jashtëzakonshme sigurie, respektivisht njësi të mëdha policore e kanë mbajtur të rrethuar vendin e manifestimit.

SVP-UDC ka ftuar anëtarët dhe simpatizantët e saj që të merrnin pjesë në një “festë me folklor dhe me diskutime politike”.

Në një fjalë të mbajtur para të pranishmëve, kryetari i SVP-UDC-së Toni Brunner ka shprehur ambicien e partisë për të pasur edhe një vend ministri në Qeverinë Federale. Ndërsa Christoph Blocher ka kritikuar synimet për të hyrë në BE.

Katër vite më parë në një manifestim të ngjashëm të kësaj partie kishin ndodhur incidente të rënda, pasi që grupe majtiste kishin ndërhyrë në mesin e manifestuesve. Edhe këtë vit, grupet e përmendura kishin bërë përpjekje për të penguar tubimin.

Për të pamundësuar përsëritjen e atij skenari, këtë vit policia e kishte barrikaduar sheshin Bundesplatz. Majtistët kishin mbajtur tubim proteste në një shesh tjetër rreth një kilometër larg.