Tash edhe komiteti kundër ndalimit të burkas!

Në komitetin e kryesuar nga deputeti Andrea Caroni i FDP-së janë të përfaqësuara të gjitha partitë e spektrit politik të Zvicrës, madje edhe SVP-ja!

Keystone

Dje, edhe zyratrisht është përmbushur kushti (janë siguruar nënshkrimet) për mbajtjen e referendumit mbi iniciativën për ndalimin e mbulesës së plotë të grave myslimane, të njohur me emrin „burka“. Siç ka shkruar tashmë edhe albinfo.ch, mbrapa inciativës për votimin në fjalë qëndronte „Komiteti i Egerkingenit“, i udhëhequr nga deputeti i SVP/UDC-së, Walter Wobmann.

Vetëm një ditë pas lajmit në fjalë vjen lajmi nga taborri tjetër: deputeti nacional i FDP-së, Andrea Caroni ka krijuar një komitet që e lufton pikërisht këtë: ndalimin e burkas. Në komitetin e tij janë të përfaqësuara të gjitha partitë e spektrit politik të Zvicrës, madje edhe SVP-ja!  Përveç Caronit, në komitetjanë edhe deputeti i SP-süe Hans Stöckli, deputetja e CVP-së Barfbara Schmid-Federer, dhe ai i SVP-së, Claudio Zanetti.

Caroni, siç ka theksuar në një intervistë dhënë gazetës „Le temps“, këtë iniciativë e ka marrë nisur nga bindjet e tij liberale. „Nuk është detyrë e shtetit që t`ua caktojë qytetarëve se çfarë do të veshin ata. Veç kësaj, një ligj i tillë ndalues do të sillte më tepër byrokraci dhe do të kufizonte liritë individuale si dhe sferën private të njerëzve. Bartësit e iniciativës për ndalimin e burkas po e luajnë lojën e ekstremistëve“ ka thënë Caroni, transmeton albinfo.ch. Ashtu sikurse ekstremistët (islamikë) edhe këta (iniciatorët) janë të interesuar vetëm për të nxitur tensione, duke keqpërdorur për këtë qëllim simbolet.

Deputeti liberal dënon edhe hipokrizinë e iniciuesve. Sipas tij, qarqet e njohura si konservative, të cilat nuk janë mërzitur fort për barazinë në mes të meshkujve dhe femrave, përnjëherë i shohim të angazhohen për të drejta e një grushti turistesh nga shtetet arabe, përcjell albinfo.ch. Madje as argumenti i sigurisë, thotë Caroni, nuk është bindës: „deri tash në gjithë Evropën nuk ka pasur asnjë sulm terrorist nga një grua me burka“.