Të gjithë të bashkuar përreth familjes kosovare

Familja kosovare Buzhala, mëngjesin e së martës ka pasur një takim në komunë, ndërsa shumë prindër të nxënësve, politikanë dhe mësues kanë qenë pranë tyre, për t’i thënë “JO” dëbimit të tyre në Kosovë.

Kimete dhe Nazmi Buzhala, me tre fëmijet e tyre të moshës 2-, deri 9-vjeçare, janë shoqëruar në momunën e Bordos në Francë. Kjo familje shqiptare e ardhur nga Kosova në qytezën Lormont, gjatë muajit janar të këtij viti, rrezikohet të dëbohet nga Franca.

“Shpresoj se do të arrijmë ta bëjmë një peticion për të parandaluar dëbimin e tyre. Kështu, ne do të kemi një bazë me shkrim për të krijuar një dosje për parashtrim të kërkesës për strehim”, ka deklaruar për të përditshmen franceze “Sudouest”, Gilles Hermet nga Lidhja për të drejtat e  njeriut, gjatë një tubimi të mbajtur ditën e hënë, në përkrahje për familjen kosovare, të organizuar në shkollat e “Grand-Tressan”.

Problemi i kësaj familje, sipas komunës, është se ajo paraprakisht kishte parashtruar një kërkesë për strehim në Hungari, ndërsa Gilles Hermet e mohon një gjë të tillë. “Jemi të shqetësuar se kjo familje mund të arrestohet qysh nesër e më pas të dërgohet në qendrën e paraburgimit”, ka deklaruar Veronique Marie-Magdeleine, drejtore e shkollës në fjalë, ku mësojnë fëmijët e familjes.

“Deri më tani, ne kemi grumbulluar rreth 750 nënshkrime në përkrahje të familjes”, ka theksuar Nathalie Vigano, nga një shoqatë humanitare. Kryetari i komunës Jean Touzeau, gjithashtu i shqetësuar, ka deklaruar se trajtimi i familjes Buzhala është çnjerëzor: “Dëbimi i tyre do të jetë në kundërshtim me kuptimin e jetës dhe kundër të drejtave të njeriut”, kishte nënvizuar ai. Ata ngelin me shpresë se apelet e tyre do të hasin në mirëkuptim te autoritetet franceze.