Tërmeti në Turqi, Erdogan: Shpresojmë ta kalojmë shpejt këtë fatkeqësi

Një tërmet 7.8 ballësh u ka marrë jetën mëngjesin e sotëm më shumë se 500 personave në Turqi e Siri, përcjell albinfo.ch.

Presidenti turk, Tayip Erdogan, ka reaguar për tragjedinë përmes një postimi në Facebook, ku thotë se ekipet e kërkim-shpëtimit po punojnë në këto zona dhe shpreson që kjo fatkeqësi të kalojë sa më shpejt.

“Ekipet tona të kërkim-shpëtimit janë dërguar në zonat e prekura nga tërmeti. Ministria jonë e Brendshme dhe Shëndetësia, AFAD, Guvernatorët dhe të gjitha institucionet e tjera kanë nisur punën me shpejtësi. Po bashkërendojmë edhe punimet e nisura pas tërmetit. Shpresojmë që këtë fatkeqësi që po përjetojmë ta kalojmë sa më shpejt dhe me sa më pak dëme. Ne vazhdojmë punën tonë”, shkruan presidenti turk.

Lëkundjet e forta të mëngjesit të sotëm janë ndier edhe në Qipro, Gaza dhe Liban. Autoritetet turke shpallën “alarmin e nivelit 4” që kërkon ndihmë ndërkombëtare dhe SHBA shprehën të parat gatishmërinë për të ndihmuar.