Testet e vështira, shkak për rezultatet e ulëta të nxënësve në matematikë

Ambicet e testit zviceran të matematikës janë në “krahasim ndërkombëtar shumë të larta nëse jo edhe ekstremisht të larta”, thuhet në raport

Rezultatet e ulëta të nxënësve në gjithë Zvicrën të shënuara në testin e matematikës janë rezultat i shkallës së lartë të vështirësisë të detyrave të shtruara në test. Gazeta “Sonntagseitung” e cila ka trajtuar këtë temë në numrin e saj të sotëm, për këtë konstatim i është referuar një ekspertize të bërë nga Qendra e Luksemburgut për teste nga fusha e arsimit.

Raporti i auditimit, i autorizuar nga Konferenca e Drejtorëve Kantonalë të Arsimit (EDK) ka kritikuar detyrat nga matematika në këtë test, duke i cilësuar ato si së tepërmi “ambicioze”, transmeton albinfo.ch. Ambicet e testit zviceran të matematikës janë në “krahasim ndërkombëtar shumë të larta nëse jo edhe ekstremisht të larta”, thuhet në raport .

Kjo ambicie jorealiste ka ndikuar që vetëm 62 për qind të nxënësve të Zvicrës të arrinin rezultatin minimal të pranueshëm në testin e matematikës.

Po ashtu ka ndryshime në arritjen e rezultateve  në testet e matematikës edhe në mes të kantoneve. Kështu. Rezultatet më të larta (80%) i kanë arritur nxënësit nga Kantoni Appenzell Innerhoden ndërsa më të ulëtat (44%) ata të kantonit Baelstadt.

Nga ana tjetër, 88% të nxënësve të Zvicrës, pas ciklit të ulët të shkollimit fillor kanë arritur nivelin e kërkuar të cilësisë sa i përket aftësisë për të lexuar. Ndryshimet mes kantoneve në këtë pikë janë të vogla, njofton EDK.

---