Tetë kompani nga Kosova do të marrin pjesë në Panairin e Londrës

Në mesin e 111 vende të ndryshme të botës, Kosova do të marrin pjesë në Panairin “International Food&Drink Event 2022” në Londër

Bëhet e ditur se nga 111 vende të ndryshme të botës që do të marrin pjesë në këtë panair, tetë kompani nga Kosova që merren me prodhimin e produkteve ushqimore dhe pijeve do të marrin pjesë në “International Food&Drink Event 2022”, që do të mbahet në Londër të Anglisë nga data 21 deri 23 mars 2022, shkruan albinfo.ch.

Vlen të theksohet se ky panair me traditë 40-vjeçare shtrihet në një sipërfaqe prej 100,000 m2 dhe pritet të vizitohet nga rreth 30,000 profesionistë të ushqimit dhe pijeve. Brenda këtij panairi, shtandi i Kosovës ka një hapësirë prej 90 m2.

Në këtë panair kompanitë nga Kosova do të prezantojnë produktet e tyre, njëherësh do të kenë mundësi të krijojnë bashkëpunime me kompani të tjera, me qëllim të gjetjes së tregjeve të reja për eksport.

Pjesëmarrja në këtë panair është organizuar nga Ministria e Industrisë, Ndërmarrësisë dhe Tregtisë (MINT), përkatësisht Agjencia për Investime dhe Përkrahjen e Ndërmarrjeve në Kosovë (KIESA).

Kompanitë kosovare që do të prezantojnë prodhimet në këtë panair janë: FRUTEX, MOEA, EGI GROUP, EURO FOOD, ABI ELIF 19, ESSI, FUNGO DHE CAMEL. /Albinfo.ch

 

 

---