Tetë vjet nga nata historike e Shaqirit dhe Xhakës ndaj Serbisë

Golat e dy futbollistëve shqiptarë i sollën Zvicrës fitoren ndaj Serbisë, ndërsa festimi me shqiponjë bëri jehonë në mbarë botën

Në mbrëmjen e 22 qershorit 2018, dy futbollistët shqiptarë i siguruan Zvicrës një fitore të madhe ndaj Serbisë në Botëror, ndërsa festimi me shqiponjë mbeti një nga momentet më të kujtuara në historinë e futbollit, përcjell albinfo.ch.

Kanë kaluar tetë vjet nga një prej ndeshjeve më emocionuese dhe më të përfolura në historinë e futbollit zviceran. Më 22 qershor 2018, në Kupën e Botës në Rusi, Zvicra mposhti Serbinë me rezultat 2:1 falë golave të dy futbollistëve shqiptarë, Granit Xhakës dhe Xherdan Shaqirit.

Serbia kaloi e para në epërsi, por në pjesën e dytë Granit Xhaka barazoi rezultatin me një supergol nga distanca. Mesfushori shqiptar e festoi golin duke formuar me duar simbolin e shqiponjës dykrenare.

Kur ndeshja po shkonte drejt fundit dhe rezultati ishte 1:1, në skenë doli Xherdan Shaqiri. Ai realizoi një kundërsulm fantastik në minutën e 90-të dhe shënoi golin e fitores, duke vulosur triumfin e Zvicrës. Edhe Shaqiri festoi me simbolin e shqiponjës, ndërsa pranë tij ishte edhe Stephan Lichtsteiner.

Fitorja i hapi rrugën Zvicrës drejt fazës tjetër të Botërorit, ndërsa Serbia u eliminua nga gara. Për shumë shqiptarë anembanë botës, ajo natë mbetet një nga momentet më të veçanta sportive.

Vetë Shaqiri më vonë kishte deklaruar se goli ndaj Serbisë ishte më i rëndësishmi dhe më i bukuri i karrierës së tij. Edhe pse u pensionua nga kombëtarja zvicerane pas Euro 2024, ai vazhdon të konsiderohet një nga legjendat e futbollit zviceran./Albinfo.ch

---