BE-ja kërkon ashpërsimin e rregullave ndaj aplikantëve për “viza të arta”

Bashkimi Evropian ka paralajmëruar vendet që zbatojnë skemat për dhënien e ‘vizave të arta’ që të ashpërsojnë kontrollet ndaj aplikantëve, pasi mund të rrisin rrezikun e korrupsionit, pastrimit të parave, si dhe të shmangies tatimore.

Sipas ‘Associated Press’, Komisioni i BE-së, përmes një raporti tha se të ashtuquajturat ‘pasaporta dhe viza të arta’ të ofruara në një vend të BE-së mund të krijojnë shumë probleme në të gjitha vendet e bllokut.

Kryetari i Komisionit të Migracionit, Dimitris Avramopoulos, tha se Komisioni do të monitorojë funksionimin e këtyre skemave në mënyrë që të jetë në përputhjen të plotë me ligjin e BE-së, transmeton ‘Scan’.

“Puna që ne kemi bërë së bashku gjatë viteve të fundit sa i përket rritjes së sigurisë, forcimit të kufijve dhe mbyllja e boshllëqeve të informacionit nuk duhet të rrezikohen”, deklaroi Avramopoulos, përcjell albinfo.ch.

Bullgaria, Qiproja dhe Malta janë ndër vendet që ofrojnë pasaporta për investitorët e huaj dhe më problematiket njëkohësisht, për shkak të kontrolleve të pamjaftueshme të individëve që aplikojnë.

Ndërkohë, janë 20 shtete në Bashkimin Evropian që ofrojnë aktualisht viza për investime.