Tre të rinj rrahin shtetasin e Maqedonisë

Mëngjesin e së shtunës, në stacionin e trenave në Wettingen, tre të rinj kanë rrahur një person. Rrahësit kanë qenë të dehur dhe pjesërisht kishin konsumuar kokainë. Për shkak të lëndimeve të marra, viktima është dërguar për shërim në spitalin e afërt.

Tre të dyshuarit u arrestuan nga policia dhe bëhet fjalë për një kosovar 18-vjeçar, një serb 20-vjeçar dhe një zviceran 21-vjeçar. Sipas një komunikate të Policisë kantonale të Aargau-t, të lëshuar gjatë ditës së shtunë, viktima është një maqedonas 31-vjeçar, ndërsa rrahja kishte ndodhur pas një zënke që ishte shkaktuar në një lokal nate.

Në Kantonin e Aargau-t, gjatë fundjavës janë regjistruar 25 rrahje, ndërsa pjesëmarrësit zakonisht kanë qenë në gjendje të dehur.