Ish-emisari amerikan për dialogun Kosovë–Serbi, Richard Grenell, ka mohuar akuzat për një skemë të pretenduar pagesash që lidhen me donacione dhe qasje te administrata amerikane. Sipas raportimeve të mediave amerikane, Donald Trump ka kërkuar nisjen e hetimeve për rastin, përcjell albinfo.ch.
Sipas raportimit të mediumit amerikan Axios, rasti lidhet me një transferim prej 17.6 milionë dollarësh, të kryer në maj të vitit 2025 drejt kompanisë amerikane të sigurisë dhe mbrojtjes “Texas Armament & Technology”. Sipas pretendimeve të paraqitura në Shtëpinë e Bardhë, rreth 5.6 milionë dollarë nga kjo shumë duhej të përdoreshin si donacion për Qendrën e Arteve “Kennedy Center”, të cilën Grenell e drejtonte në atë kohë. Axios – raportimi për hetimin.
Në mesazhin që pretendohet se Grenell ia kishte dërguar biznesmenit turk Turhan Mildon në maj të vitit 2025, përmendet mundësia e pjesëmarrjes në ngjarje ekskluzive dhe e krijimit të lidhjeve më të afërta me administratën amerikane, përfshirë presidentin Trump, në këmbim të realizimit të donacionit.
Grenell i ka mohuar akuzat, duke i cilësuar ato si të pavërteta. Ai ka deklaruar se nuk ka kërkuar që para të transferoheshin diku tjetër në emër të një donacioni për “Kennedy Center” dhe se nuk ka marrë pagesa nga Mildon.
Rasti mori një kthesë të re pasi Alina Habba, bashkëshortja e Mildonit dhe ish-avokate e Trumpit, ia paraqiti pretendimet presidentit amerikan. Sipas raportimeve, Trump më pas udhëzoi këshilltarin ligjor të Shtëpisë së Bardhë që të shqyrtojë rastin dhe të verifikojë dokumentet përkatëse.
Deri më tani, pretendimet nuk janë vërtetuar përfundimisht dhe hetimi synon të sqarojë se ku përfunduan paratë dhe nëse donacioni i premtuar ishte realizuar.
Grenell, figurë e njohur edhe në dialogun Kosovë–Serbi
Richard Grenell është i njohur në Kosovë për rolin e tij si emisar special i administratës së Donald Trumpit për dialogun Kosovë–Serbi gjatë periudhës 2019–2021. Ai ishte përfshirë në përpjekjet amerikane për arritjen e marrëveshjeve ekonomike ndërmjet Prishtinës dhe Beogradit.
Përfshirja e tij në këtë çështje të re ka tërhequr vëmendje edhe për shkak të profilit të tij politik dhe marrëdhënieve të afërta që ka pasur me Trumpin. Megjithatë, hetimet janë ende në zhvillim dhe nuk ka një përfundim zyrtar që vërteton përgjegjësinë e tij për pretendimet e ngritura. /Albinfo.ch
