Unia: “Pa të huajt nuk ka Zvicër”

Sikur të mos ishin punëtorët e huaj, shumë vende pune në Zvicër, veçmas në ndërtim dhe në shëndetësi do të mbeteshin të pambuluara

Unia, sindikata më e madhe e Zvicrës ka lancuar një fushatë kundër urrejtjes ndaj të huajve dhe kundër diskriminimit të tyre. Me moton “Pa ne nuk ka Zvicër”, kjo sindikatë, siç shkruan në komunikatën e saj, dëshiron të japë një sinjal kundër klimës së distancimit, e cila është duke mbretëruar aktualisht në Zvicër.

Sepse, vazhdon komunikata, sikur të mos ishin punëtorët e huaj, shumë vende pune në Zvicër, veçmas në ndërtim dhe në shëndetësi do të mbeteshin të pambuluara. Por, në vend të mirënjohjes, shpesh herë këta njerëz marrin diskriminimin nga shoqëria e këtushme.

Në kuadrin e fushatës janë paraparë një numër aksionesh nëpër sheshe publike.

Fushata pritet të zgjasë katër muaj. Në përmbyllje të saj, më 17/18 dhjetor është paraparë të mbahet një simpozium ndërkombëtar mbi migracionin, për mbajtjen e të cilit qe vendosur në muajin shkurt, në forumin social botëror të mbajtur në Dakar të Senegalit.