Universitetet e Prishtinës dhe Zagrebit nënshkruajnë marrëveshje bashkëpunimi akademik

Marrëveshja, e ndërmjetësuar nga Ambasada e Kosovës në Kroaci, synon të forcojë shkëmbimin e studentëve, kërkimin shkencor dhe bashkëpunimin ndëruniversitar.

Fakulteti Filozofik i Universitetit të Prishtinës dhe Fakulteti i Shkencave Politike i Universitetit të Zagrebit kanë nënshkruar një marrëveshje bashkëpunimi, duke shënuar një hap të rëndësishëm në forcimin e lidhjeve akademike ndërmjet Kosovës dhe Kroacisë, përcjell albinfo.ch.

Nënshkrimi i marrëveshjes u bë me ndërmjetësimin dhe iniciativën e Ambasadës së Republikës së Kosovës në Kroaci, e cila ka luajtur rol kyç në krijimin e këtij partneriteti ndëruniversitar.

Marrëveshja parashikon zgjerimin e bashkëpunimit në fusha të ndryshme, përfshirë shkëmbimin e studentëve dhe stafit akademik, zhvillimin e projekteve të përbashkëta kërkimore, si dhe organizimin e aktiviteteve shkencore dhe profesionale me interes të ndërsjellë.

Nga Ambasada e Kosovës në Kroaci u theksua se diplomacia nuk ndërton vetëm ura politike, por edhe ura të dijes, shkencës dhe bashkëpunimit afatgjatë. Sipas tyre, ky partneritet do t’u shërbejë brezave të rinj dhe do të kontribuojë në forcimin e mëtejshëm të marrëdhënieve ndërmjet Kosovës dhe Kroacisë./Albinfo.ch

---