“Ushtria serbe i ka ende duart e përgjakura”

Më tej ai kërkoi nga ata që t’i kërkojnë falje popullit të Kosovës e të Bosnjës, për tragjeditë e shkaktuara

Avdullah Hoti, i Lidhjes Demokratike të Kosovës, i drejtohet presidentit të Serbisë, Aleksandër Vuçiq dhe kryeministres Ana Bërnabiq, duke u thënë nëse ndonjë shteti duhet t’i ndalohet të ketë ushtri, atëherë kjo vlen për Serbinë.

“Ushtria juaj, z.Vuçiq dhe znj. Bërnabiq, është e komprometuar, ngase ka ende duart e përgjakura. Është ushtria juaj ajo për të cilën dihet botërisht se ka shkaktuar spastrim etnik dhe gjenocid, ka dhunuar e vrarë gra e foshnja në Kosovë, Bosnjë e gjetiu”, tha Hoti në rrjetin social Facebook.

Hoti shprehet se ushtria e Kosovës do të jetë ushtri që garanton dhe gjeneron paqe, që aspiron NATO-n e misionet paqeruajtëse gjithandej në botë, përcjell albinfo.ch.

“Do të ndërtohet dhe kalitet që të ndihmojë popuj të tjerë gjithandej globit, të cilët mund të përfshihen në tragjedi të ngjashme, me ato që pësuam ne nga falangat gjenocidale të ushtrisë serbe”, tha Hoti.

Më tej ai kërkoi nga ata që t’i kërkojnë falje popullit të Kosovës e të Bosnjës për tragjeditë e shkaktuara.

---