Vallëzimi kolektiv përshkallëzon në dhunë

Rreth njëzet policë rezultojnë të loënduar pasi që grupe të maskuarish kanë devijuar qëllimin e protestës dhe kanë filluar rebelimin e tyre kundër forcave të rendit

Një vallëzim masiv publik “tanz dich frei” (vallëzo i lirë) i paralajmëruar me bujë në qytetin e Bernës ka përfunduar me dhunë dhe trazira. Rreth njëzet policë rezultojnë të loënduar pasi që grupe të maskuarish kanë devijuar qëllimin e protestës dhe kanë filluar rebelimin e tyre kundër forcave të rendit. Policia, që ishte në mbrojtje të Pallatit federal dhe institucioneve tjera, ka reaguar me gaz lotsjellës, plumba gome dhe vrushkuj uji kundër protestuesve. “Luftimet” kanë zgjatur rreth një orë. Sipas burimeve policore bëhet fjalë për rreth 70 persona që kanë ushtruar dhunë ndaj policisë, ndërsa shumica e madhe e pjesëmarrësve në manifestim kanë vallëzuar në mënyrë paqësore, nën ritmet e muzikës që lëshohej nga dhjetëra altoparlante.

Thirrjen për vallëzim e kishte bërë një kolektiv anonim përmes facebook-ut. Qëllimi i paralajmëruar ishte protesta kundër mungesës së hapësirave të lira dhe jokomerciale për organizime të ndryshme.

“Tanz dich frei” është organizuar për herë të parë në vitin 2011, me ç`rast kanë marrë pjesë rreth 400 veta. Një vit më vonë, nëpër mot të bukur manifestimit i ishin bashkuar 10 mijë veta ndërsa në manifestimin e mbrëmshëm vlerësohet të kenë qenë të pranishëm rreth 7000 pjesëmarrës.

Organizatorët në një paraqitje nga e njëjta faqe interneti mbrëmë vonë kanë shprehur keqardhje për dhunën e ushtruar nga grupe margjinale. Por ata kanë kritikuar edhe policinë e cila, sipas tyre e ka pasur “prioritet më të madh mbrojtjen e pallatit federal se sa atë të njerëzve”.