Veturat pa shofer janë autorizuar nga sot në Zvicër, por nuk është miratuar asnjë mjet autonom

Keystone EPA/DAVID GONZALEZ

Rishikimi i ligjit për trafikun rrugor, i cili hyri në fuqi të shtunën, më 1 mars, lejon drejtimin me autopilot në autostrada. Në realitet, askush nuk do të jetë në gjendje të heqë dorë nga timoni, pasi në Zvicër ende nuk është miratuar asnjë automjet autonom.

Ju mund të ëndërroni të lëshoni timonin dhe ta lini makinën tuaj të përballojë bllokimet e trafikut. Ngasja e automatizuar tani lejohet në autostrada dhe në rrugë të caktuara, të përcaktuara nga kantonet, me kusht që të jeni gati të rimerrni kontrollin e automjetit sa më shpejt që të jetë e nevojshme.

Epo… në teori. Sepse ligji i ka kapërcyer prodhuesit e makinave. “Për momentin nuk është miratuar asnjë mjet i automatizuar” në Zvicër, thekson Patrizia Portmann, shefe e Zyrës Federale të Rrugëve për Rregullim të Komunikacionit, transmeton albinfo.ch.

Aktualisht, dy modele janë miratuar në Gjermani dhe mund të miratohen në vendin tonë brenda disa muajsh nëse prodhuesit e kërkojnë.

ër momentin, çdo shofer që provon vozitje autonome në rrugët zvicerane po rrezikon, sipas Patrizia Portmann. “Është super i rrezikshëm. Këto sisteme nuk janë ende të afta, për shembull, të menaxhojnë një kantier ndërtimi ose një aksident në autostradë. Shoferi është përgjegjës për kostot e shkaktuara nga një aksident për sa i përket sigurimit. Kjo mund të çojë në një dënim dhe heqje të lejes së drejtimit”, ka thënë ajo për RTS.

Rishikimi i ligjit parashikon gjithashtu që njeriu mund ta lërë makinën të parkojë vetë në hapësira të caktuara. Këtu përsëri, asnjë parking i dedikuar nuk është gati.

Në praktikë, ligji nuk do të përdoret që nga e shtuna, por tregon se Zvicra është e gatshme për risi në fushën e vozitjes së automatizuar.