Vjena, një nga destinacionet më të sigurta të udhëtimit në Evropë

Një portal udhëtimesh e ka renditur Vjenën në mesin e 20 destinacioneve më të sigurta të udhëtimit.

Vendet evropiane gradualisht po hapin kufijtë e tyre, hotelet dhe linjat e fluturimit. Portali i udhëtimit “Destinacionet më të mira evropiane” ka bërë një listë për t’i orientuar të gjithë ata që nuk dinë ku të shkojnë dhe cilat masa të sigurisë merren në vende individuale dhe rajone.

Ndër “20 destinacionet më të sigurta në Evropë” janë ato që u preken më pak nga Covid-19, qytete të cilat kanë ndërmarrë masa të përshtatshme sigurie si dhe kanë një infrastrukturë të përshtatshme shëndetësore.

Vjena është një nga qytetet që bën pjesë në atë listë, shkruajnë mediat austriake, transmeton Albinfo Austria.

Norbert Kettner, drejtor menaxhues i “Wien Tourismus”, tha: “Standardet e larta të sigurisë dhe pastërtisë së Vjenës janë vërtetuar se janë një pasuri në pozicionimin e publikut të udhëtimit për vite me radhë – aq më tepër në kohën e Covid-19”.

Sipas  portalit “Destinacionit më të mira evropiane”, Vjena vizitohet gjatë gjithë vitit nga udhëtarët, “të cilët po kërkojnë një destinacion udhëtimi të sigurt dhe paqësor”.

Shkalla e krimit është deri në tri herë më e ulët se në kryeqytetet e tjera evropiane. “Me shumë parqe dhe mjete transporti, Vjena është një nga qytetet me cilësi më të mirë të jetës në Evropë”, theksoi Kettner.

Përveç kësaj, muaj më parë Vjena ishte shpallur si qyteti më i gjelbëruar në botë.

---