Vlerësohet se paga minimale në Kosovë diskriminon punëtorët

Foto ilustrim

Paga minimale në Kosovë vazhdon të jetë më e ulëta në rajon, madje ajo është edhe diskriminuese dhe për këtë është e nevojshme që ajo të rritet.

Kështu u tha në tryezën e organizuar nga Instituti Demokratik i Kosovës, në bashkëpunim me Drejtorinë për Hulumtime, Bibliotekë dhe Arkiv të Kuvendit të Kosovës.

Deputeti i Partisë Socialdemokrate, Visar Ymeri, tha se paga minimale në Kosovë është më e vogla në rajon dhe me një pagë të tillë, fuqia blerëse ka rënë.

Ai theksoi se përmes interpelancës së kërkuar nga PSD-ja, do të kërkojnë rritjen e pagës minimale dhe që korrigjimi i saj të bëhet për çdo vit. Edhe kryetari i BSPK-së, Avni Hajdini, u pajtua se me vendosjen e pagës minimale është bërë një diskriminim, pasi që ajo është ndarë në bazë të moshës.  Pavarësisht nevojës për ngritje të pagës minimale në Kosovë, Nora Jusufi nga Instituti GAP deklaroi se duhet të studiohen edhe pasojat e rritjes së saj.