Vrasje në Prishtinë, një grua vret kunatin, me të cilin jetonin në të njëjtën shtëpi

Një ngjarje e rëndë ka ndodhur sonte në lagjen “Kodra e Trimave”, në Prishtinë. Një grua dyshohet se vrau kunatin e saj me të cilin jetonin në të njëjtën shtëpi.

Lajmi u konfirmua për mediat në Kosovë nga zëdhënësja e Policisë, Flora Ahmeti.

Sipas saj, vrasësja është dorëzuar në polici dhe e ka dorëzuar armën në Stacionin Policor në Dragodan.

“Sot rreth orës 19:20 kemi pranuar informatën për një vrasje, që ka ndodhur në rrugën ‘Ismet Krasniqi’ në Prishtinë. Menjëherë policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen. Lidhur me rastin është vetëdorëzuar një person, e dyshuara: N.M., femër . Aktualisht hetuesit policorë, në koordinim me prokurorin e shtetit janë duke punuar për të ndriçuar dhe sqaruar të gjitha rrethanat që kanë të bëjnë me këtë rast”, tha Ahmeti.