“Wiener Linien” ua vazhdon biletat studentëve deri në shtator

Kompania e transportit publik në Vjenë, “Wiener Linien” ka vendosur që për shkak të pandemisë, biletat aktuale semestrale të studentëve të vazhdohen deri në fund të shtatorit

Me biletën e tyre të semestrit veror, studentët mund të përdorin të gjithë transportin publik në Vjenë pa kufizime deri më 30 shtator 2020, shkruan faqja e kompanisë wienerlinien.at, transmeton Albinfo Austria.

“”Kjo shpëton studentët nga nevoja për të blerë një biletë mujore pushimesh për korrik, gusht dhe shtator. Ne duam të solidarizohemi me të rinjtë në këtë situatë sfiduese, ” ka thënë Ulli Sima, këshilltare për transportin publik.

Virusi korona që nga mesi i marsit shkaktoi kufizime  të daljes së popullatës në Austri. Universitetet dhe kolegjet u mbyllën ndërsa mësimi u realizua në distancë. Si rezultat, shumë studentë përdorën biletën e tyre të semestrit shumë pak ose në një masë të kufizuar.

Kjo zgjidhje e vullnetit të mirë ka ndihmuar studentët të cilët ishin goditur rëndë financiarisht edhe nga humbja e vendeve të punës.

 

---