Xhaka, lojtari i ndeshjes

Mesfushori shqiptar është vlerësuar me notën 8.2, duke u shpallur lojtari i ndeshjes

Zvicra shënoi një fitore të rëndësishme duke mundur Islandën në udhëtim me rezultat 2:1 në kuadër të Ligës së Kombeve, shkruan albinfo.ch.

Nga vlerësimet e bëra pas përfundimit të ndeshjes në bazë të performancës së ekipeve në fushën e blertë, ekipi zviceran ka marrë notën 6.99, ndërsa skuadra vendase është vlerësuar me 6.61.

Pas harkimit të bukur të Granit Xhakës në zonë, topi ka përfunduar tek Seferoviq, i cili ka realizuar golin e parë me kokë. Ky asistim ka lehtësuar punën e vlerësuesve të cilët e kanë shpallur shqiptarin lojtarin më të mirë të ndeshjes. Mesfushorit i është vënë nota 8.2, ndërsa Xherdan Shaqirit 7.6.

Albian Ajeti është inkuadruar vetëm në minutën e 91-të, derisa Florent Hadërgjonaj nuk luajti fare në dy ndeshjet me Zvicrën.

Kështu Hadërgjonaj ende nuk ka debutuar me Zvicrën në garat zyrtare.

---