Xhaka: Mustafi është DJ i yni

“Mustafit i pëlqen ta zgjedhë muzikën në zhveshtore”, është shprehur Granit Xhaka

Mesfushori shqiptar i Zvicrës, Granit Xhaka ka dhënë një intervistë interesante për mediat angleze. Ai për “Soccer AM”, si shumë lojtarë të tjerë, ka folur se cili është futbollisti më i mirë në fushë që ka luajtur, shoku i ngushtë, por edhe kush i argëton më shumë, përcjell albinfo.ch.

Futbollisti më i mirë me të cilin ka luajtur është gjermani Mesut Ozil. “Mesut Ozil është lojtari më i mirë me të cilin kam luajtur deri më tani. Ai është futbollist i rrugës, filloi të luajë futboll në rrugë. Atij i pëlqen të bëjë gjëra me top, ta ketë topin në këmbët e tij dhe është një futbollist i jashtëzakonshëm”, ka deklaruar Xhaka.

“Ai është një djalosh brilant, shumë i hapur dhe gjithmonë u ndihmon të tjerëve. Ai është një djalosh shumë i mirë, i shoqërueshëm dhe mund të them vetëm gjëra të mira për të”, theksoi mesfushori shqiptar.

Ai nuk la pa përmendur edhe futbollistin tjetër shqiptar tek Arsenali, Shkodran Mustafi.

“Mustafit i pëlqen ta zgjedhë muzikën në zhveshtore. Ndërsa, për ndeshje është më e përzier. Rob Holding i zgjedhë këngët zakonisht para ndeshjeve, por edhe Mustafi e bën këtë gjë”, theksoi Xhaka.

“Por, Robi dhe Mustafi janë lojtarët të cilët i zgjedhin këngët më së shpeshti. Mustafi dëgjon shumë këngë gjermane, ndërsa Robi i zgjedhë më shumë këngët angleze”.

Xhaka shtoi se shok të ngushtë në ekip ka Stephan Lichtsteinerin, të cilin e njeh që një kohë të gjatë.

---