Zgjatet deri më 2027 pjesëmarrja e Shqipërisë në KFOR

Forcave të Armatosura të Republikës së Shqipërisë u është zgjatur pjesëmarrja në misionin ushtarak të NATO-s, KFOR, në Kosovë. Për këtë ka vendosur Këshilli i Ministrave të qeverisë shqiptare, i cili miratoi sot disa ndryshime në vendimin.

Konkretisht, u vendos kohëzgjatja e këtij misioni nga 31 dhjetor 2024 në 31 dhjetor 2027, raporton ATSh, përcjell Albinfo.ch.

Gjithashtu në vendim ndryshon edhe dieta për ditët e qëndrimit, pasi nga 6 mijë lekë në ditë shkon në 12 mijë lekë në ditë, përveç pagës mujore.

Vendimi parashikon se periudha e qëndrimit në mision për çdo përfaqësues do të jetë me sistem rotacioni çdo 6 muaj dhe 1 vit për postin ACOS SPT, periudha, të cilave u shtohen edhe ditët e qëndrimit për ndërrimin me kontingjentin e radhës (marrje dhe dorëzim detyre, vonesa të transportit strategjik).

Efektet financiare që rrjedhin nga zbatimi i këtij vendimi përballohen nga buxheti i Ministrisë së Mbrojtjes./Albinfo.ch