Zhegrova debuton në minutat e fundit, Juventus triumfon 3:0

Edon Zhegrova u aktivizua vetëm në minutat e fundit në fitoren e Juventusit ndaj Sassuolos.

Reprezentuesi i Kosovës u inkuadrua në lojë në minutën e 89-të, ndërsa Juventusi triumfoi të martën në udhëtim me rezultat të pastër 3:0, në ndeshjen e vlefshme për xhiron e 19-të të Serie A italiane, përcjell albinfo.ch.

“Zonja e Vjetër” kaloi në epërsi që në minutën e 16-të falë një autogoli të Tarik Muhameroviqit. Dy golat e tjerë u realizuan në pjesën e dytë, ku fillimisht Fabio Miretti shënoi për 2:0 në minutën e 62-të, ndërsa vetëm një minutë më pas Jonathan David vulosi fitoren.

Rezultati mund të ishte edhe më i thellë, por portieri i Kosovës, Arijanet Muriq, pati një paraqitje të mirë, veçanërisht në pjesën e parë të ndeshjes.

Me këtë fitore, Juventusi u ngjit në vendin e katërt të tabelës me 36 pikë, ndërsa Sassuolo zbret në pozitën e 11-të me 23 pikë.

---