Zjarr i madh në Valis

Rreth 100 njerëz është dashur të evakuoheshin nga banesat në rrethinën ku ka ndodhur shpërthimi i zjarrit

Në fshatin Riddes të Valisit ka shpërthyer mbrëmë një zjarr i madh.

Depoja e një punëtorie për përpunimin e drurit është djegur në tërësi ndërsa rreth 100 njerëz është dashur të evakuoheshin nga banesat në rrethinën ku ka ndodhur shpërthimi i zjarrit. Zjarri kishte kapluar edhe një shtëpi në afërsi të punëtorisë.

Siç njofton Policia kantonale e Valisit, nuk ka asnjë të lënduar nga ky zjarr ndërsa personat e evakuuar tashmë janë kthyer në shtëpitë e tyre. Policia ka thënë mbrëmë po ashtu se aksioni për shuarjen e zjarrit mund të vazhdonte gjithë natën.

Dëmet materiale të shkaktuara nga zjarri janë të konsiderueshme. Për hetimin e shkaqeve të shpërthimit të zjarrit policia kërkon dëshmitarë.

Për shkak të tymit të shkaktuar nga ky zjarr, autostrada A9 në pjesën pranë fshatit Riddes është dashur të bllokohej përkohësisht.