Zvicër: 21 infeksione të reja brenda 24 orëve

Ndonëse më i madh se dje, edhe ky numër është mjaft i ulët dhe është brenda trendit të rënies së fuqisë së virusit

Zyra Federale e Shëndetit Publik (BAG) ka raportuar sot 21 raste me koronavirus, që është një rritje e vogël në krahasim me një ditë më parë.

Të kujtojmë: dje, ditë e hënë ka pasur 10 infeksione të reja, që ishte numri më i ulët që nga ditët e para të regjistrimit të rasteve me koronavirus, shkruan albinfo.ch. Sidoqoftë edhe ky numër është mjaft i ulët dhe është brenda trendit të rënies së fuqisë së virusit.

Numri i vdekjeve të lidhura me sëmundjen e mushkërive Covid-19 në të gjitha kantonet, sot ka arritur në 1887, sipas agjencisë së lajmeve Keystone-SDA.

Ndërsa BAG ka treguar, si zakonisht, një numër tjetër të rasteve të vdekjes nga Covid-19. Sipas saj deri më sot janë 1614 të vdekur. Zyra Federale me këtë rast u referohet raporteve që laboratorët dhe mjekët kishin dërguar deri të martën në mëngjes, si pjesë e detyrimit të raportimit.

Deri më tani, janë kryer 350.099 teste në shkallë vendi. Sipas BAG, dhjetë për qind e këtyre kanë rezultuar pozitive.

 

---