Zvicër: 66 të vdekur nga koronavirusi, prej tyre 48 vetëm në Kantonin e Tiçinos

Vetëm gjatë 24 orëve të fundit, në kantonin më të prekur të Zvicrës kanë vdekur 11 persona

Zyra Federale e Shëndetit Publik (BAG) ka bërë të ditur sot paradite se në Zvicër tashmë janë regjistruar 8060 persona që kanë rezultuar pozitivë në testimet e bëra për koronavirus.

Ky numër është për 1000 më i madh se ai i një dite më parë.

Po kështu, sipas BAG deri më sot, nga pasojat e koronavirusit në Zvicër kanë vdekur 66 persona, që është për 6 më shumë se të dielën, transmeton albinfo.ch. Ndërkaq, mediat shkruajnë se vetëm në Kantonin e Tiçinos deri më tani 48 persona kanë gjetur vdekjen nga koronavirusi.

Vetëm gjatë 24 orëve të fundit, në kantonin më të prekur të Zvicrës kanë vdekur 11 persona, citohet të kenë thënë nga Shtabi i Emergjencave në këtë kanton. Me këtë numër, kantoni në fjalë përfundimisht ka dukshëm më shumë se gjysmën e të vdekurve nga koronavirusi në gjithë vendin.

Ndër kantonet tjera më të prekur janë Kantoni Vaud dhe ai Baselstadt.

Sipas platformës worldmeters.info (https://www.worldometers.info/coronavirus) del se në Zvicër tashmë janë 118 të vdekur nga koronavirusi, por albinfo.ch ashtu si dhe pothuaj të gjitha mediat e Zvicrës, në lajmet që publikon, bazohet në të dhënat zyrtare nga Zyra Federale e Shëndetit Publik (BAG).

---