Zvicër: A do të vazhdojë rënia e çmimit të karburanteve?

Keystone

Çmimet e benzinës kanë shënuar rënien më të madhe që nga fillimi i luftës në Ukrainë në shkurt të vitit 2022, duke sjellë një lehtësim të ndjeshëm për shoferët në Evropë. Vetëm që nga prilli i vitit 2024, çmimi mesatar i një litri karburant ka rënë me 18 cent, dhe ekspertët paralajmërojnë se kjo tendencë mund të vazhdojë, shkruan RTS, transmeton albinfo.ch.

“Kur e mbush rezervuarin dy ose edhe tre herë në muaj për të shkuar në punë, mund ta ndjesh vërtet ndryshimin,” u shpreh një shofer për RTS, ndërsa një tjetër shtoi: “Ne ndiejmë një rënie të caktuar dhe nuk po ankohemi. Le të shpresojmë që të zgjasë!”

Sipas të dhënave aktuale, çmimi i një litri naftë ka rënë nga 1.97 franga në 1.84 franga brenda një viti, ndërsa benzina pa plumb 95 ka rënë nga 1.93 franga në 1.73 franga.

Pas fillimit të pushtimit rus të Ukrainës, çmimet tejkaluan kufirin simbolik prej 2 frangash për litër. Sot, disa indikatorë sinjalizojnë rënie të mëtejshme. “Çmimi i naftës është faktor kyç, por ndikon edhe niveli i lumit Rein. Kur niveli është i lartë, më shumë karburant mund të transportohet me anije, duke ulur koston e transportit,” tha Marco Wölfli nga TCS.

Megjithatë, rënia e çmimeve nuk është domosdoshmërisht tregues i stabilitetit ekonomik. Sipas profesorit të ekonomisë në Universitetin Paris-Dauphine, Patrice Geoffron, ulja e çmimeve është rezultat i tre zhvillimeve: rritjes së prodhimit global të naftës, frikës nga rënia e konsumit për shkak të tensioneve tregtare dhe dobësimit të dollarit.

“Është një lajm i mirë, por me një efekt të papritur: mund të importojmë energji më lirë, por kjo vjen në një kontekst të stresit ekonomik, ngadalësimit të rritjes, papunësisë dhe borxhit në Evropë,” paralajmëron Geoffron.

Sipas tij, çmimi i benzinës mund të bjerë deri në 1.50 franga për litër, por zhvillimet politike, veçanërisht në SHBA, mund ta ndryshojnë sërish drejtimin e tregjeve, transmeton albinfo.ch.