Zvicër: Mungesa e “së drejtës për t’u harruar” në shëndetësi ndez debat politik

Keystone

Në Zvicër, pacientët që kanë pasur sëmundje serioze si kanceri, diabeti apo dëmtime të rënda janë të detyruar të deklarojnë historinë e tyre mjekësore gjatë gjithë jetës kur kërkojnë sigurime private. Ndryshe nga disa vende të BE-së, në Zvicër nuk ekziston “e drejta për t’u harruar” në fushën e sigurimeve shëndetësore dhe të humbjes së të ardhurave, çka po nxit debat të fortë politik.

Personat që kërkojnë sigurim shëndetësor suplementar, sigurim jete apo sigurim për humbje të të ardhurave duhet të plotësojnë pyetësorë të detajuar mbi sëmundjet, trajtimet dhe ndërhyrjet mjekësore, edhe nëse këto kanë ndodhur shumë vite më parë. Sipas ekspertëve, kjo situatë çon shpesh në refuzim sigurimi, prime më të larta ose klauzola kufizuese për pacientët me histori të rënda shëndetësore, transmeton albinfo.ch.

Rasti i Mathilde (emër i ndryshuar), një psikoterapiste e pavarur e diagnostikuar me kancer për herë të dytë pas 15 vitesh, ilustron pasojat konkrete: për shkak të sëmundjes së mëparshme, ajo nuk arriti të siguronte mbulim për humbje të të ardhurave dhe u detyrua të mbështetej te kursimet e saj gjatë trajtimit. Ajo e konsideron këtë situatë diskriminuese dhe një rrezik serioz për të ardhmen profesionale.

Në vende të tjera evropiane si Franca, Spanja, Italia dhe Belgjika, ligji parashikon një afat pas të cilit pacientët nuk janë më të detyruar të deklarojnë kancerin e kaluar, duke ua lehtësuar aksesin në sigurime dhe kredi. Sipas specialistëve, Zvicra mbetet prapa në këtë drejtim.

Debati ka mbërritur tashmë në Parlament. Deputeti Benjamin Roduit ka propozuar që detyrimi për deklarimin e të dhënave mjekësore të kufizohet në pesë vjet për sigurimet e kompensimit ditor. Shoqata Zvicerane e Sigurimeve e kundërshton nismën, duke paralajmëruar rritje të primeve dhe barrë shtesë për të gjithë të siguruarit.

Këshilli Federal pritet të japë qëndrimin e tij për këtë çështje në fillim të marsit, ndërsa debati publik sapo ka nisur.