Zvicër: Nga gjithsej 30.725 të infektuar, janë shëruar 27.900 veta

BAG ka raportuar një numër të pandryshuar vdekjesh nga Covid-19 në krahasim me dje, pra sipas saj janë 1641. Por Keystone-SDA raporton për 1903 të vdekur

Gjatë 24 orëve të fundit, në Zvicër dhe Lihtenshtajn, janë raportuar 18 infeksione të reja me koronavirus. Ky numër është për pesë më i madh se ai i raportuar të premten.

Deri më sot janë regjistruar gjithsej 30,725 raste të konfirmuara nga laboratori, ka bërë të ditur të shtunën Zyra Federale e Shëndetit Publik (BAG). 27.900 veta të prekur nga virusi tashmë janë shëruar, njofton worldometers.info, transmeton albinfo.ch.

BAG ka raportuar një numër të pandryshuar vdekjesh nga Covid-19 në krahasim me dje, pra sipas saj janë 1641. Zyra Federale i referohet raporteve që laboratorët dhe mjekët kishin dërguar deri në mëngjes të shtunën, si pjesë e detyrimit të raportimit.

Por, sipas agjencisë së lajmeve Keystone-SDA numri i vdekjeve tnga koronavirusi në të gjitha kantonet të shtunën pasdite ishte 1903, ose një më shumë sesa ishte raportuar një ditë më parë, përcjell albinfo.ch. Keystone-SDA analizon të dhënat zyrtare të disponueshme në faqet e internetit të kantoneve.

Ndërsa sipas worldmeters.info të shtunën kanë qenë 1905 të vdekur, ose 2 më shumë se një ditë më parë

Shkalla e prekjes nga Covid 19 në Zvicër është 358 infeksione në 100,000 banorë.  367.037 teste janë kryer deri më tani në shkallë vendi dhe, sipas BAG, 10 për qind e këtyre kanë rezultuar pozitive.

---