Zvicër: Pa punën me orar të shkurtuar, papunësia do të shkonte mbi 20%

Megjithatë, kjo punë ka gllabëruar miliarda. Deri në fund të gushtit, në arkat e papunësisë qeveria ka derdhur 6.7 miliardë franga

Pa instrumentin e punës me orar të shkurtër, shkalla e papunësisë në Zvicër do të ishte rritur përkohësisht gjatë krizës së koronavirusit për më shumë 20 për. Kjo rezulton nga një “vlerësim i përafërt” që ka bërë Sekretariati Shtetëror për Çështjet Ekonomike (Seco), shkruan sda.ch.

Vlerësimi në fjalë lidhet me njoftimin e publikuar sot se shkalla e papunësisë gjatë gushtit është rritur në 3.3% nga 3.2% sa ishte në korrik 2020, gjegjësisht 2.1% sa ishte në gushtin e vitit 2019.

Boris Zürcher, Shef i Drejtorisë së Punës në Seco, ka vendosur kuotat përkatëse për muajt mars dhe prill në “mbi 10 për qind” (në vend të 2.9%) rsp. në “më shumë se 20 për qind” (në vend të 3.3%), transmeton albinfo.ch. Më pas, në qershor kjo normë e vlerësuar ka rënë përsëri në 8 për qind.

“Puna me orar të shkurtër ka ndihmuar në mënyrë të jashtëzakonshme në mos lejimin e shpërthimit të papunësisë”, është shprehur Zürcher. Megjithatë, kjo punë ka gllabëruar miliarda, ka pranuar ai. Deri në fund të gushtit, në arkat e papunësisë qeveria ka derdhur 6.7 miliardë franga.

Në disa degë ekonomike, përqindja e punës me kohë të shkurtër është akoma e lartë, për shembull në qershor ishte 32 për qind në degën e turizmit dhe rreth 20 për qind në industrinë e prodhimit. Megjithatë, Zürcher thotë se trendi është në rënie.

Kjo tregohet edhe nga numri i regjistrimeve për punë me orar të shkurtë, të aprovuara paraprakisht. Sepse ata që kanë aplikuar për punë me kohë të shkurtër në muajin mars është dashur të paraqisnin një kërkesë të re për zgjatjen e saj, në muajin gusht, përcjell albinfo.ch.

Për shtator, sipas Zürcher, puna me kohë të shkurtër u është aprovuar vetëm 422,100 punonjësve, që korrespondon me rreth 8 për qind të të punësuarve. Në kulmin e krizës leje të tilla ishin dhënë për 1.9 milion punëtorë.

---