Zvicër: Ulje e vogël e rasteve, por gjendja mbetet e pasigurt, thonë ekspertët

Varianti Omikron aktualisht është ende më pak i përfaqësuar në Zvicër, por po bëhet gjithnjë e më i shpeshtë në vendet fqinje

Sot, në Bernë kanë mbajtur një konferencë shtypi për zhvillimet aktuale rreth pandemisë ekspertët dhe përfaqësuesit e Zyrës Federale të Shëndetit Publik (BAG).

Në vazhdim, një përmbledhje.

Varianti Omikron aktualisht është ende më pak i përfaqësuar në Zvicër, por po bëhet gjithnjë e më i shpeshtë në vendet fqinje, ka thënë shefja e Taskforcës shkencore federale, Tania Stadler, transmeton albinfo.ch. Ajo ka shtuar se ky variant është treguar se është më ngjitës. Zvicra duhet të përgatitet për Omikron-in.

“Ne supozojmë se varianti Omikron së shpejti do të jetë dominues në Zvicër”, thotë Stadler. Prandaj do të infektohen gjithashtu edhe shumë persona që tashmë janë vaksinuar. Për shkak se Omikron është më ngjitës se Delta, spitalet do të mbushen shpejt. Është e paqartë se sa vaksinimi, te rasti i Omikronit, mbron nga rrjedha e rëndë e sëmundjets, shton Stadler.

Christoph Berger nga Komisioni Federal për Çështje të Vaksinimit ka folur për vaksinimin e fëmijëve. Pasojat e sëmundjes së Covid-19 janë veçanërisht të vogla për fëmijët më të vegjël. Rrjedha e sëmundjes është pothuajse gjithmonë shumë e lehtë.

Rreziku i efekteve anësore: Asnjë efekt anësor nuk është identifikuar ende në Shtetet e Bashkuara. Si shembull: Miokarditi, i cili ndonjëherë shfaqet tek të rriturit, nuk është dokumentuar kurrë në moshën pesë deri në njëmbëdhjetë vjeç.

Berger shpjegon proporcionin rrezik-përfitim sa i përket vaksinimit të fëmijëve, përcjell albinfo.ch. Ai zyrtarisht rekomandon vaksinimin vetëm për fëmijët me sëmundje të mëparshme ose fëmijët që jetojnë me njerëz në rrezik.

Rezultati i përgjithshëm i operacionit të mbrojtjes civile (angazhimit të ushtrisë) është pozitiv. Për kantonet në veçanti, ai ishte një instrument qendror dhe i rëndësishëm për mbrojtjen e popullsisë.

Virginie Masserey (BAG) e përshkruan zhvillimin epidemiologjik si shumë të pasigurt. Numrat aktualë të rasteve po tregojnë një rënie Megjithatë, është e paqartë nëse ka vërtet ndonjë shenjë të një ngadalësimi. Dallimet midis kantoneve janë ende shumë të mëdha. Incidenca është më e lartë në Zvicrën qendrore dhe lindore.

---