Zvicër: Trenat plot me udhëtarë e askush nuk mban maskë

Pas zhbllokimit, trenat janë përsëri më të mbushur me njerëz. Por shoqata e transportit publik nuk dëshiron të vendosë detyrimin për vënie të maskave mbrojtëse

Në Bernë, për shkka të një problemi teknik, u desh që pasagjerët e disa trenave të grumbulloheshin në një tren të vetëm. Kjo bëri që në atë tren të bëhej një tollovi e konsiderueshme, ashtu që nuk mund të bëhej më fjalë për mbajtjen e distancës në mes të udhëtarëve. Edhe në këtë tollovi, ishin shumë të rrallë ata që bartnin maska…

Dhe kjo është pikërisht ajo që autoritetet duan të parandalojnë në luftën kundër koronavirusit, shkruan srf.ch.

Një situatë e pakënaqshme, thotë Ueli Stückelberger, drejtues i Shoqatës së Transportit Publik, transmeton albinfo.ch. Operatorët hekurudhorë dhe autobusët rekomandojnë vënien e maskës nëse nuk mund të sigurohet distanca prej dy metrash.

Qeveria federale është përgjegjëse për këtë pasiguri, thotë Stückelberger: “Zyra Federale e Shëndetit Publik (BAG) ka bërë një ndërhyrje në fillim, sa u përket maskave, ​​duke komunikuar se vënia e tyre është e padobishme. Njerëzit ende kanë këtë bindje të krijuar që atëherë. Ne dyshojmë fort se kjo është arsyeja pse njerëzit nuk mbajnë më maska, edhe nëse rekomandohet”.

Shoqata e Transportit Publik vazhdon të mbështetet në përgjegjësinë personale të udhëtarëve, përcjell albinfo.ch. Stückelberger rekomandon që të gjithë udhëtarët të kenë gjithmonë një maskë me vete, për ta përdorur në rastet kur  krijohen tollovi në tren ose autobus.

Megjithatë, ai kundërshton që maska të bëhet e detyrueshme vetëm në transportin publik: “Ne nuk duam që transporti publik të stigmatizohet. Transporti publik vlerësohet lart në Zvicër dhe nuk është rast i veçuar. Kjo është arsyeja pse ne nuk duam ndonjë rregullore tjetër. ”

Qeveria federale është ajo që duhet të vendosë për detyrimin e vënies së maskës. Por, Zyra Federale e Shëndetit Publik, e pyetur nga srf, nuk ka dashur të komentojë çështjen e detyrimit në fjalë, pëercjell albinfo.ch. Kjo çështje po rivlerësohet vazhdimisht, thuhet në një deklaratë me shkrim. Këshilli Federal do të diskutojë përsëri brenda një jave, çështjen e maskave.

Aktualisht, mbetet vetëm rekomandimi për të bartur maskë. Një rekomandim që shumica e udhëtarëve nuk e përfillin.

---