Zvicra dënon ashpër sulmin mbi policët kosovarë

Ata që janë përgjegjës për këtë akt dhune duhet të mbajnë përgjegjësi, thuhet në tekstin e postuar në shërbimin e mesazheve të shkurtra X

Departamenti i Punëve të Jashtme të Zvicrës (EDA) “dënon fuqishëm” sulmin ndaj policëve kosovarë në veri të Kosovës.

Kështu shkruan EDA në shërbimin e mesazheve të shkurtra X (ish – twitter). Ata që janë përgjegjës për këtë akt dhune duhet të mbajnë përgjegjësi, thuhet në tekstin e publikuar nga srf.ch.

EDA po reagon kështu ndaj ngjarjeve më të reja, të dhunshme, në rajon, transmeton albinfo.ch. Policët kosovarë dhe një grup personash të armatosur janë duke shkëmbyer të shtëna armësh në veri të Kosovës. Disa prej tyre janë vrarë, duke përfshirë një polic kosovar.

Kryeministri i Kosovës Albin Kurti dhe presidenti serb Aleksandar Vuçiq fajësojnë njëri-tjetrin për përplasjen e dhunshme.

---