Zvicra pa mesfushorin Sierro për ndeshjet kualifikuese ndaj Suedisë dhe Kosovës

Zvicra humb një tjetër mesfushor para ndeshjeve me Suedinë dhe Kosovën

Federata Zvicerane e Futbollit ka konfirmuar se mesfushori Vincent Sierro nuk do të jetë i disponueshëm për dy ndeshjet vendimtare të nëntorit kundër Suedisë dhe Kosovës, pas një lëndimi në këmbë të konstatuar nga stafi mjekësor, transmeton albinfo.ch.

Në njoftimin zyrtar thuhet se lëndimi është diagnostikuar të hënën në mesditë dhe se futbollisti është larguar nga grumbullimi për të marrë trajtimin e nevojshëm në klubin e tij.

“Mesfushori Vincent Sierro do të mungojë në dy ndeshjet kualifikuese të Kupës së Botës ndaj Suedisë dhe Kosovës. Lëndimi në këmbë është diagnostikuar nga stafi mjekësor të hënën në mesditë. Sierro është larguar nga kombëtarja për të marrë trajtim te klubi”, thuhet në deklaratën e Federatës Zvicerane.

Kjo mungesë vjen në një moment të rëndësishëm për përfaqësuesen helvetike, e cila me një fitore në këto dy ndeshje do të siguronte matematikisht kualifikimin në Kupën e Botës.

Trajneri Murat Yakin pritet të bëjë rregullime në mesfushë për të mbuluar mungesën e Sierros, në përpjekje për të ruajtur stabilitetin dhe ritmin e skuadrës në fundin e fazës kualifikuese.

https://www.football.ch/sfv/nationalteams/a-team/news/maenner-nationalteam-vincent-sierro-faellt-verletzt-aus.aspx

---