Zvicra përballet me vonesa të reja në sistemin e mbrojtjes nga raketat

Departamenti Federal i Mbrojtjes, Mbrojtjes Civile dhe Sportit (VBS) ka konfirmuar se afati fillestar nuk mund të respektohet më

Planet e Zvicrës për forcimin e mbrojtjes ajrore po përballen me një tjetër vonesë. Blerja e sistemit të dytë të mbrojtjes nga raketat, i njohur si Bodluv GR2, nuk do të mund të realizohet deri në fund të vitit 2026, siç ishte planifikuar.

Departamenti Federal i Mbrojtjes, Mbrojtjes Civile dhe Sportit (VBS) ka konfirmuar se afati fillestar nuk mund të respektohet më, transmeton albinfo.ch.

Për realizimin e blerjes brenda këtij viti do të ishte e nevojshme që çështja të trajtohej me procedurë urgjente nga të dyja dhomat e Parlamentit gjatë sesionit dimëror. Megjithatë, Këshilli Kombëtar nuk ka pranuar një procedurë të tillë, duke bërë që procesi të shtyhet.

Tashmë i takon Këshillit Federal të analizojë situatën e re dhe të vendosë për hapat e ardhshëm.

Tre vende në garë për sistemin e ri

Vlerësimi për sistemin e dytë të mbrojtjes ajrore tashmë ka përfunduar, ndërsa vendimi për modelin që do të blejë Zvicra i takon Këshillit Federal.

Oferta detyruese janë paraqitur nga prodhues nga Franca, Izraeli dhe Koreja e Jugut.

Sistemi i ri synon të plotësojë mbrojtjen ajrore të Zvicrës dhe të zvogëlojë boshllëkun e krijuar nga vonesat në dorëzimin e sistemit amerikan Patriot.

Në përzgjedhjen përfundimtare pritet të merren parasysh disa faktorë, përfshirë performancën e sistemit kundër kërcënimeve në distancë, disponueshmërinë, çmimin, mundësitë e integrimit dhe aspektet e politikës së jashtme dhe të sigurisë.

Gjashtë miliardë franga për mbrojtjen ajrore

Për sistemin e dytë dhe mbulimin e një pjese të kostove shtesë që lidhen me Patriot-in janë planifikuar gjithsej rreth gjashtë miliardë franga.

Financimi pritet të bëhet nga paketa shtesë prej 24 miliardë frangash e miratuar nga Parlamenti për forcimin e ushtrisë zvicerane.

Problemet me mbrojtjen ajrore nuk kufizohen vetëm te sistemi i ri. Edhe dorëzimi i sistemeve Patriot të porositura nga Shtetet e Bashkuara është shtyrë ndjeshëm.

Sipas autoriteteve zvicerane, për shkak të ndryshimit të prioriteteve amerikane në furnizimin me Patriot dhe zhvillimeve ndërkombëtare, Zvicra tani duhet të llogarisë me një vonesë prej rreth pesë deri në shtatë vjetësh për sistemet amerikane.

Pikërisht për këtë arsye, Qeveria zvicerane vendosi të kërkojë paralelisht një sistem të dytë të mbrojtjes ajrore me rreze të gjatë, me synimin për të forcuar sa më shpejt mbrojtjen ndaj raketave, dronëve dhe sulmeve të tjera nga distanca.

Sipas autoriteteve federale, deri në vënien në funksion të njërit prej sistemeve të mbrojtjes ajrore me rreze të gjatë, Zvicra vazhdon të ketë një boshllëk në mbrojtjen kundër kërcënimeve të tilla.

---