Zvicra po humb talentet shqiptarë, 14 futbollistë zgjedhin Shqipërinë dhe Kosovën

Një analizë nga portali zviceran “Nau.ch” ka nxjerrë në pah një fenomen të rëndësishëm në futbollin evropian: shumë futbollistë të rinj me prejardhje shqiptare, të rritur në Zvicër dhe të formuar në akademitë zvicerane, po zgjedhin të përfaqësojnë Shqipërinë ose Kosovën në arenën ndërkombëtare.

Rasti më i fundit është ai i portierit Eman Kospo, i cili vendosi të luajë për Bosnjë-Hercegovinën, duke refuzuar opsionin për të përfaqësuar Zvicrën.

Sipas analizës, 14 lojtarë me origjinë shqiptare që kanë kaluar nëpër sistemin e moshave të Zvicrës kanë zgjedhur rrugë të ndryshme, duke përfaqësuar Shqipërinë apo Kosovën, përkundër mundësisë për të qenë pjesë e kombëtares zvicerane.

Në mesin e tyre janë edhe emra të njohur që kanë lënë gjurmë në futbollin ndërkombëtar. Nedim Bajrami, për shembull, pasi luajti 51 ndeshje me grupmoshat e Zvicrës, vendosi në vitin 2021 të veshë fanellën kuqezi të Shqipërisë. Ai hyri në histori në “Euro 2024” duke shënuar golin më të shpejtë ndonjëherë në një Kampionat Evropian, përballë Italisë.

Edhe Florent Hadërgjonaj, i cili kishte një paraqitje me ekipin A të Zvicrës në një miqësore, zgjodhi Kosovën në vitin 2019 dhe ka zhvilluar 38 ndeshje për “Dardanët”, me një gol dhe katër asistime në kualifikime të mëdha.

Ndër figurat më interesante është Albert Bunjaku, tani trajner i Kosovës U19. Ai ka luajtur për Zvicrën, por pas pranimit të Kosovës në UEFA në vitin 2016, luajti edhe për Kosovën.

Ja cilët janë futbollistët që i kthyen shpinën Zvicrës:

Ata që zgjodhën Kosovën:

Bledian Krasniqi – 38 ndeshje me moshat e Zvicrës

Toni Domgjoni – 25 paraqitje

Benjamin Kololli – pa paraqitje me Zvicrën

Betim Fazliji – 2 paraqitje

Mirlind Kryeziu – 23 paraqitje

Florent Hadërgjonaj – 1 ndeshje me ekipin A të Zvicrës

Amir Shaipi – 18 paraqitje

Ata që zgjodhën Shqipërinë:

Nedim Bajrami – 51 paraqitje me Zvicrën

Amir Abrashi – 43 paraqitje

Taulant Xhaka – 44 paraqitje

Frederic Veseli – 57 paraqitje

Shkëlzen Gashi – 46 paraqitje

Berat Gjimshiti – 20 paraqitje

Shkaqet për këto zgjedhje janë të ndryshme  nga konkurrenca e lartë në kombëtaren e Zvicrës, deri te ndjenja e identitetit kombëtar dhe dëshira për të kontribuar për vendin e origjinës.

Ky trend ka shtuar debatet në Zvicër, ndërsa Shqipëria dhe Kosova po përfitojnë nga përvoja dhe cilësia e talenteve të rritur në një sistem futbolli shumë të zhvilluar.

 

---