Zvicra shkollon tepër pak mjekë

22 për qind e gjithsej 7000 mjekëve që punojnë në Zvicër, kanë diplomë të marrë në një vend tjetër

Zvicra “prodhon” numër të pamjaftueshëm mjekësh, prandaj, mungesën e tyre ajo e plotëson me mjekë që vijnë nga jashtë. Këtë konstatim e ka bërë një raport i publikuar të premten në Bernë, nga Qeveria e Zvicrës.

Sipas këtij raporti, 22 për qind e gjithsej 7000 mjekëve që punojnë në Zvicër, kanë diplomë të marrë në një vend tjetër, shkruan swissinfo.ch.

Madje, nëpër spitale, pjesa e mjekëve të huaj mbërrin në 30 për qind, ndërsa në shërbimet ambulantore, 14%.

Sipas asaj që ministri i shëndetësisë Didier Burkhalter tha dje para medieve, për të plotësuar nevojat e veta me mjekë, Zvicra duhet të nxjerrë për çdo vit 1200 deri 1300 mjekë nga fakultetet e këtushme të mjekësisë. Kjo shifër është për 50 për qind më e madhe se kapacitetet e sotme të këtyre fakulteteve.

Së këndejmi, ministri ka thënë se është e nevojshme një rritje e kapaciteteve. Por duhen edhe masa tjera si shtimi i efikasitetit, koordinim më i mirë etj.

Megjithatë, për ministrin Burkhalter heqja e “Numerus Clausus” (kuota e lejuar e studentëve që regjistrojnë mjekësinë) nuk është opsion. Kjo, sipas tij, do të shkaktonte që më pak studentë të mbaronin me sukses studimet e mjekësisë.