Zvicra, të rekrutojë punëtorë nga vendet jashtë BE-së

Sipas Travail Suisse, më së shumti duhen rekrutuar punëtorë më pak të kualifikuar në shërbimet ndihmëse shëndetësore dhe në amvisëri

Federata e Sindikatave të Zvicrës “Travail Suisse” thotë se Zvicra ka nevojë për më shumë fuqi punëtore nga vendet jashtë BE-së.

Kjo organizatë druan se, për shkak të zhvillimeve demografike, në të ardhmen, nevojat e tregut të punës i Zvicrës do të ketë më pak mundësi që të plotësohen me punëtorë nga shtetet e BE-së. Si reagim, ajo kërkon një hapje ndaj fuqisë punëtore të vendeve që nuk janë anëtare të Bashkimit Evropian.

Sipas Travail Suisse, më së shumti duhen rekrutuar punëtorë më pak të kualifikuar. Kjo sepse, mungesa e punëtorëve të kualifikuar, sipas federatës së sindikatave zvicerane është problem i njohur ndërkohë që shoqëria zvicerane ende nuk e ka identifikuar sa duhet problemin e mungesës së punëtorëve me kualifikime të ulëta.

Nevojat më të mëdha për punëtorë të tillë paraqiten në shërbimet ndihmëse shëndetësore dhe në amvisëri.