Të rinjtë shqiptarë nga Gjeneva, Prizreni dhe Kruja sjellin traditën në një skenë të përbashkët

Një mbrëmje kulturore në Gjenevë që bashkon tre grupe të reja në interpretimin e valleve tradicionale shqiptare

Më 16 maj, në Gjenevë do të mbahet eventi kulturor “Vallja na bashkon – Gëziminjë”, organizuar nga Association Rinia Contact, një mbrëmje e dedikuar promovimit të valles tradicionale shqiptare dhe bashkimit të të rinjve përmes trashëgimisë kulturore.

Në këtë aktivitet do të prezantohen tre grupe të rinjsh: nga Gjeneva, Prizreni dhe Kruja, të cilët do të sjellin në skenë repertorë të ndryshëm të valleve tradicionale, duke pasqyruar larminë dhe pasurinë e kulturës shqiptare.

Ngjarja zhvillohet në kuadër të vizitës katërditore që të rinjtë nga Prizreni dhe Kruja do të realizojnë në Gjenevë. Gjatë kësaj periudhe, ata do të mirëpriten dhe do të qëndrojnë pranë familjeve dhe bashkëmoshatarëve të komunitetit shqiptar, në një format që ndërthur mikpritjen me shkëmbimin kulturor.

Ky prezantim përbën një shembull të drejtpërdrejtë të bashkëpunimit mes të rinjve shqiptarë në diasporë dhe në troje, duke e vendosur traditën në një hapësirë të përbashkët përjetimi dhe komunikimi.

Data: 16 maj
Ora: 19:30
Vendi: Salle Lully, Lancy (Gjenevë)
Hyrja: e lirë (vendet e kufizuara)

---