21,6 milionë pasagjerë priten në Shqipëri deri në 2040

Aviacioni civil në Shqipëri po shënon një rritje të vazhdueshme dhe po kthehet në një portë kryesore hyrëse për vendin.

Sipas Autoritetit Ndërkombëtar të Aviacionit Civil (ICAO), numri i pasagjerëve që udhëtojnë me avion pritet të arrijë 21,6 milionë deri në vitin 2040, krahasuar me 784,6 mijë pasagjerë që pritet të fluturojnë përmes Aeroportit të Rinasit në vitin 2025, përcjell albinfo.ch.

Zëvendëskryeministrja dhe ministre e Infrastrukturës dhe Energjisë, Belinda Balluku, deklaroi se aeroportet ndërkombëtare të Tiranës, Vlorës, Kukësit dhe së shpejti edhe ai i Gjirokastrës po vendosin Shqipërinë në një pozicion të ri strategjik në turizëm dhe lidhje ndërkombëtare.

“21,6 milionë pasagjerë është projeksioni i ICAO për vitin 2040. Aviacioni civil po rritet çdo vit, duke u bërë porta kryesore hyrëse për vendin. Aeroportet tona po arrijnë shifra rekord vizitorësh,” tha Balluku.

Në vitet e fundit, Shqipëria ka regjistruar një rritje të dukshme të pasagjerëve. Vetëm gjatë periudhës janar-gusht 2025, Aeroporti i Rinasit regjistroi mbi 7,8 milionë pasagjerë, një rritje prej 9% krahasuar me të njëjtën periudhë të vitit të kaluar. Numri i fluturimeve arriti 42 462, me një rritje prej 2%, duke lidhur Tiranën me 137 destinacione.