40 mijë qytetarë të Kosovës, drejt bregdetit shqiptar

Radhë kilometrike në Rrugën e Kombit, fluks i madh turistësh nga Kosova drejt Shqipërisë

Ditët e fundit të gushtit kanë shënuar një fluks të jashtëzakonshëm të hyrjeve në Shqipëri të shtetasve të Kosovës, me destinacion bregdetin shqiptar, përcjell albinfo.ch.

Radhë kilometrike janë vërejtur që në orët e para të mëngjesit të së shtunës në segmentin Morinë -Kukës të Rrugës së Kombit, tek Ura e Drinit të Zi, raportojnë mediat shqiptare.

Mijëra qytetarë nga Kosova me automjetet e tyre dhe autobusë po i drejtohen bregdetit shqiptar. Sipas të dhënave nga autoritetet kufitare të shtunën në mëngjes kanë kaluar pikën kufitare të Morinës rreth 40 mijë shtetas të Kosovës, ndërsa në 25 ditët e para të gushtit kanë hyrë në Shqipëri mbi 400 mijë shtetas të Kosovës.

Në pikën e përbashkët kufitare Shqipëri-Kosovë nuk ka kontrolle për qytetarët, që kalojnë në të dyja vendet, kjo për shkak të marrëveshjes mes dy qeverive për të lehtësuar lëvizjen e qytetarëve.

Marrëveshja mes dy shteteve ka mundësuar që deri më 30 shtator për çdo fundjavë dhe festë zyrtare, qytetarët të mos regjistrohen nga Policia e Kosovës dhe Shqipërisë.

---