600 mijë të varfër në Zvicër

Në fokus të programit qeveritar kundër varfërisë do të jetë arsimimi i fëmijëve të shtresave të margjinalizuara

Në Zvicër vlerësohet se rreth 600 mijë njerëz jetojnë në kufirin e varfërisë. Kjo ka detyruar qeverinë federale të veprojë. Ajo i është qasur problemit në nivel nacional duke planifikuar një program pesëvjeçar për luftimin e varfërisë.

Ky program pritet të fillojë së realizuari në vitin 2014 dhe do të përfundojë në vitin 2018, njofton Ministria Federale e Punëve të Brendshme. Kjo ministri, është zotuar që deri në pranverën e vitit 2013 të përpunojë një propozim lidhur me këtë problematikë.

Dy vjet pas konferencës nacionale për varfërinë, kreu i ministrisë së përmendur, Alain Berset do të presë në një tryezë të rrumbullakët përfaqësues nga kantonet, qytetet dhe komunat si dhe OJQ-të e interesuara për të bërë një bilanc dhe për të diskutuar lidhur me ecurinë e mëtejshme.

Sipas ministrisë, në fokus të programit do të jetë arsimimi. Fëmijët dhe të rinjtë nga shtresat margjinalizuara sociale do të nxiten që në të ardhmen të mund të kujdesen vetë për jetesën e tyre. Kjo kërkon marrjen e një sërë masash, nga fëmijëria e hershme deri në përfundimin e shkollimit profesional, njofton sf1.

Me gjithë faktin se përshëndet këtë hap, Caritas-i i Zvicrës e konsideron shumë modest buxhetin e paraparë për këtë qëllim, prej gjithsej 1.8 milion frangash në vit.