Gjykata i jep të drejtë ankesës kundër zhurmës nga kambana e kishës

Ky vendim i gjykatës administrative mund të ketë pasoja të mëdha, pasi që mund të shërbejë si precedent edhe për komuna dhe kisha të tjera të kantonit

Një çift nga qyteti Wädenswil i Kantonit të Cyrihut mund të shpresojë se tash e tutje do të bëjë gjumë të rehatshëm. Kjo do t`u mundësohet falë vendimit të Gjykatës Administrative të kantonit, e cila ka miratuar ankesën e çiftit kundër tingujve të kambanës së Kishës së Reformuar të këtij qyteti, shkruan srf.ch. Kështu, kambanarja tash e tutje do të mund të lëshojë tingujt e vet gjatë natës jo më katër herë por vetëm një herë brenda një ore.

Ky vendim i gjykatës administrative mund të ketë pasoja të mëdha, pasi që mund të shërbejë si precedent edhe për komuna dhe kisha të tjera të kantonit, transmeton albinfo.ch. Qyteti dhe kisha ishin munduar të argumentonin rrahjen e kambanës katër herë në orë me faktin se kjo është pjesë e traditës. Por, sipas vendimit të gjykatës, respektimi i traditës do të jetë i mjaftueshëm edhe nëse rrahjet e kambanës rrallohen në një herë në orë.

Çifti që është ankuar, jeton 200 metra nga kambanarja dhe është ankuar për prishje të gjumit nga tingujt që vinin nga kisha. Gjykata ka konstatuar se interesi për më shumë qetësi të natës peshon mbi atë të ruajtjes së traditës. Por, një rol të veçantë në këtë vendim ka pasur një studim shkencor i realizuar nga universiteti ETH. Sipas studimit, mjafton një zhurmë prej 40 deri në 45 decibelash për të shkaktuar shqetësim. Deri tash ishte menduar se duheshin 60 decibelë për një gjë të tillë. Ndërkaq lartësia e zhurmës së kambanës që dëgjohet në banesën e çiftit, është 48 decibela.