Arrestohet deputetja: Ka ndihmuar hyrjen ilegale në Zvicër të 4 refugjatëve

Politikania humaniste, themeluese e një organizate pro refugjatëve, ka ndihmuar katër migrantë që të hyjnë ilegalisht në Zvicër, përmes kufirit jugor të saj

Një deputete në Parlamentin e Kantonit të Ticinos, Lisa Bosia Mirra nga Partia Socialdemokrate (SP/PS) është arrestuar sot me një motiv të pazakonshëm: ajo fajësohet se ka bërë përpjekje të “trafikojë” refugjatë nga Italia në Zvicër.

Në të vërtetë, politikania humaniste ka ndihmuar katër migrantë që të hyjnë ilegalisht në Zvicër, përmes kufirit jugor të saj, në Stabio, njoftojnë mediat zvicerane.

Siç bëhet e ditur në një komunikatë të Policisë Kantionale të Ticinos, krahas politikanes së përmendur, me këtë rast është arrestuar edhe një burrë nga Berna, i cili i ka transportuar me kamionin e tij katër refugjatë të moshës së mitur, duke i futur në Zvicër.

Të dytë ngarkohen me akuzën për lehtësim të kalimit ilegal të kufirit.

Bosia Mirra është themeluese e organizatës “Firdaus” e cila mbron refugjatët, transmeton albinfo.ch. Ajo, në një paraqitje publike të bërë të mërkurën ka kritikuar qasjen e shtetit zviceran në kufirin jugor me refugjatët e mitur të pashoqëruar.