Zviceranët i kalojnë 2449 kilometra në tren e kosovarët, vetëm 6 kilometra

Me 2449 kilometra hekurudhorë të kaluara në vit për kokë banori, Zvicra lë për më shumë se 1000 kilometra mbrapa Austrinë, e cila është e dyta në Evropë, me 1427 kilometra në vit për banor

Zviceranët, tashmë dihet, janë të parët pa konkurrencë në Evropë për shfrytëzimin e trenit si mjet transporti. Me 2449 kilometra hekurudhorë të kaluara në vit për kokë banori, Zvicra lë për më shumë se 1000 kilometra mbrapa Austrinë, e cila është e dyta në Evropë, me 1427 kilometra në vit për banor, njofton orf.at. Sidoqoftë, në mesin e vendeve anëtare të BE-së, Austria është e para, ka bërë të ditur Schienen-Control sot në Vjenë.

Pas Austrisë vjen Franca me 1387 kilometra pastaj Suedia me 1293 dhe Danimarka me 1203 kilometra në vit për kokë banori, transmeton albinfo.ch. Vetëm pas tyre, në vendin e gjashtë vjen Gjermania me 1121 kilometra.

Kilometrazh veçanërisht të shkurtër hekurudhore për kokë banori ndër vendet e BE-së ka Greqia, gjegjësisht 78 kilometra. Por rekordin në Evropë, jashtë BE-së gjithsesi e mban Kosova, me vetëm 6 kilometra në vit për kokë banori, përcjell albinfo.ch.

Mesatarja e të gjitha vendeve evropiane, të trajtuara në këtë listë është 937 kilometra për banor në vit.