PDK: Gjykata u ndikua nga presioni i partisë së klaneve terroriste  

Stavileci: "Gjykata Supreme, mbase edhe e ndikuar nga presioni publik që kjo parti klanesh terroriste ka bërë mbi anëtarët e saj, anuloi rinumërimin e votave"

Partia Demokratike e Kosovës ka komentuar vendimin e djeshëm të Gjykatës Supreme, e cila e pranoi si të bazuar ankesën e Vetëvendosjes për mos-rinumërim në Komunën e Prizrenit. PDK-ja ka hedhur akuza të rënda ndaj Lëvizjes Vetëvendosje, të cilën e ka quajtur edhe parti klanesh terroriste.

Zëdhënësi i PDK-së, Blerand Stavileci ka thënë se Supremja i vërtetoi si të pabazuara kërkesat e tyre për rinumërim votash edhe pse, sipas tij, PDK-ja ka ofruar argumente, në bazë të të cilave shihet qartë manipulimi me vota i bërë nga Vetëvendosje.

“Gjykata Supreme, mbase edhe e ndikuar nga presioni publik që kjo parti klanesh terroriste ka bërë mbi anëtarët e saj, anuloi rinumërimin e votave. Pra, qenka hedhur poshtë pretendimi se paska pasur tendencë të manipulimit të zgjedhjeve dhe se drejtësia është e kapur”, ka thënë Stavileci në një konferencë për media.