Më pak pasaporta zvicerane për të huajt

Numri i të huajve që u pajisen me pasaporta zvicerane ka shënuar  rënie me gati një të tretën në tremujorin e parë të këtij viti. Nga janari deri në mars 2018, 7098 persona morën pasaportën zvicerane, 3080 më pak se në të njëjtin tremujor të vitit të kaluar. Arsyeja për rënien është e paqartë, përcjell albinfo.ch.

Natyralizimet e zakonshme (-31,5 për qind), dhe natyralizimet e lehtësuara (-26,6 për qind) kanë shënuar rënie në tre muajt e parë të këtij viti a, siç bëjnë të ditur statistikat për të huaj të Sekretariatit Shtetëror për Migrim (SEM), shkruan albinfo.ch.

Sidomos rënia ishte e theksuar në mesin e italianëve (-51.1 për qind) dhe portugezëve (-48.3 për qind). Por edhe në mesin e francezëve (-34.2 për qind), spanjollët (-29.6 për qind).  Dëshira për shtetësinë zvicerane ishte më pak e theksuar sesa një vit më parë.

Deri më tani, ekspertët në Sekretariatit Shtetëror për Migrim nuk kanë dhënë ende një “shpjegim të saktë” për këto lëvizje. Megjithatë, ata supozojnë se kjo lëvizje është e përkohshme dhe nuk korrespondon me një prirje të përgjithshme. Sidoqoftë, numri i kërkesave është rritur ndjeshëm përsëri këtë vit.