Sa rrezikojnë të dënohen Xhaka dhe Shaqiri

Dy futbollistët shqiptarë mund të dënohen me gjobë, ose dy ndeshje, kurse është përjashtuar nga çdo hetim kapiteni i skuadrës, Stefan Lichtsteiner

keystone

FIFA edhe zyrtarisht ka hapur procedurë ndaj Granit Xhakës e Xherdan Shaqirit pas festimit të tyre me shqiponjë pas golave ndaj Serbisë.

Kjo pasi Federata e Serbisë ishte ankuar se ata kanë provokuar, përcjell albinfo.ch.

Me këtë rast, FIFA mund t’i ndëshkojë dy lojtarët nëse festimet e tyre vlerësohet të kenë provokuar publikun. Nëse shpallen fajtorë, Xhaka dhe Shaqiri mund të ndëshkohen me nga dy ndeshje mos-lojë.

Kjo nënkupton se dyshja mund të mos paraqitet në ndeshjen e fundit të Grupit E kundër Kosta Rikës dhe pastaj në fazën tjetër, nëse kualifikohet, i bie të luajë ose me Meksikën ose me Gjermaninë.

Megjithatë, dy futbollistët mund të dënohen me gjoba, dhe të marrin vërejtje.

Ndërkohë që është përjashtuar nga çdo hetim kapiteni i skuadrës, Stefan Lichtsteiner.

Në hetim ka përfunduar edhe trajneri i kombëtares serbe Mladen Krstajiq që në përfundim të takimit u shpreh se vetëm serbët dënohen në bazë të gjykimeve selektive.

Ndërkohë që në hetim kanë përfunduar edhe korret raciste të tifozerisë serbe përgjatë të gjithë takimit sidomos në momentet kur topi zotërohej nga futbollistët shqiptarë të Zvicrës.