Çdo i katërti mjek është i huaj në Zvicër

Politikanët propozojnë trajnime shtesë për mjekët emigrantë, ngase sipas tyre, nuk janë të standardit zviceran

Përqindja e mjekëve në Zvicër që kanë përfunduar shkollimin e tyre jashtë vendit për herë të parë ka tejkaluar 25-përqindëshin.

Këto shifra i ka bërë publike “SonntagsZeitung”, duke u bazuar në një raport të vitit 2011 të Shoqatës së Mjekëve të Zvicrës FMH.

Shifrat flasin për disa sektorë, ku ka më shumë mjekë të huaj sesa zviceranë.

Sipas kryetarit të FMH-së, Jacques de Haller, fluksi i mjekëve të huaj nga jashtë po vazhdon në Zvicër.

Për deputetin nacional të SVP-së,Toni Bortoluzzi, studimet në mjekësi janë shumë më të lehta në vende të ndryshme sesa në Zvicër.

Ndërsa për deputetin tjetër të CVP-së, Ruth Humbel, mjekët e huaj për nga cilësia e shkollimit nuk janë të standardit zviceran.

Politikani i SP-së, Jean-Francois Steiert, flet për mungesën e aftësive gjuhësore te personeli shëndetësor i huaj në Zvicër.

Në vend të shkurtimit të planifikuar për trajnime shtesë nga Shoqata e Mjekëve FMH, politikanët propozojnë trajnime shtesë si dhe kurse të gjuhës për mjekët emigrantë.