Zjarrfikësve zviceranë u mungon uji, nuk arrijnë ta shuajnë zjarrin

Edhe përkundër mobilizimit të madh, zjarrfikësit nuk kanë arritur ta shuajnë zjarrin. Arsyeja: Mungesa e ujit.

Foto: Kapo St. Gallen

Për shkak se ekipi i zjarrfikësve nuk ka pasur ujë të mjaftueshëm për të vepruar, mëngjesin e së enjtes është djegur një shtëpi në Flums SG, pavarësisht se në vendngjarje kanë qenë të pranishëm një numër i madh i zjarrfikësve. Shkaku i zjarrit mbetet i paqartë.

Për shkak të mungesës së ujit, operacioni i shpëtimit ishte vështirësuar, ka pohuar policia. Uji është dashur të merrej në disa vende dhe, ndër të tjera, edhe nga një përrua në afërsi, shkruajnë mediat zvicerane, njofton Albinfo.ch. Edhe pse të mobilizuar kanë qenë më shumë se 70 pjesëtarë të ekipit të zjarrfikësve të Flums, Walenstadt dhe Quarten, ata nuk kanë mundur ta pengojnë djegien e plotësishme të shtëpisë.

Për fat të mirë, gjatë djegies së shtëpisë, brenda nuk ka qenë asnjë person dhe askush nuk është lënduar. Banuesja e shtëpisë, rreth orës 09.40 e ka alarmuar ekipin e zjarrfikësve. Në momentin që brigada e shpëtimit ka arritur në vendngjarje, zjarri tashmë e kishte përfshirë gjithë shtëpinë. Dëmi i shkaktuar vlerësohet në disa qindra-mijëra franga zvicerane, ndërsa kanë filluar hetimet për shkaktimin e zjarrit.